बाबुराम भट्टराईको फेसबुक स्टेटसले मच्चियो तहल्का, गृहमन्त्रीको कुर्सी हल्लियो

काठमाडौं – कञ्चनपुरकी बालिका निर्मला पन्तको बलात्कार र हत्या घटनाका सम्बन्धमा पूर्वप्रधानमन्त्री तथा नयाँशक्ति पार्टी नेपालका संयोजक डा. बाबुराम भट्टराईले बिहीबार साँझ फेसबुकमा लेखेको स्टेटसले तहल्का मच्चिएको छ ।

नेता भट्टराईले स्टेटसमा गृहमन्त्रीलाई सिधा निशाना लगाउँदै प्रहार गरेका छन् । जिल्ला प्रहरी कार्यालय कञ्चनपुरका तत्कालिन एसपी दिल्लीराज विष्ट र वडा प्रहरी कार्यालय महेन्द्रनगरका प्रमुख इन्सपेक्टर जगदीश भट्टको बखास्तीबारे असन्तुष्टि जनाएका छन् ।

भट्टराईले निर्मला पन्त बलात्कार र हत्या प्रकरणमा प्रत्यक्ष संलग्न भएको देखिने गरी मुद्दा ढाकछोप गर्न तथा प्रमाण नष्ट गर्न लागिपरेका विष्ट र भट्टलाई ‘भविष्यमा अयोग्य नठहरिने गरी’ बर्खास्त गरेर सरकारले पानीमाथिको ओभानो हुने प्रयत्न गरेको आरोप लगाएका छन् ।

उनले विष्ट र भट्टलाई पक्राउ गरेर बास्तविक अपराधी पत्ता लगाउनुपर्नेमा उल्टै उन्मुक्ति दिने प्रयास भएको आरोप लगाएका छन् । ‘बलात्कार र हत्या जस्तो जघन्य अपराधको प्रमाण जानीबुझी नष्ट गर्नु झन् ठूलो अपराध हैन ?’ भट्टराईले बिहीबार अबेर सामाजिक सञ्जालमार्फत् भनेका छन्, ‘ त्यसको अर्थ ती प्रहरीलाई अपराधी को हो भन्ने थाहा छ भन्ने प्रष्ट हुन्न र ? त्यसवापत तिनलाई पक्रेर वास्तविक अपराधी पत्ता लगाउनु पर्दैन ?’



बम दिदीबहिनीमाथि गम्भीर केरकार र अनुसन्धान नगरी छाडिएको प्रति पनि नउनले असन्तुष्टि जनाएका छन् । यो काण्डमा शक्तिशालीहरू मुछिएको दाबी गर्दै भट्टराईले सरकारी संयन्त्र अपराधीलाई जोगाउन लागिपरेको स्पष्ट भएको पनि उल्लेख गरेका छन् ।

भट्टराईले निर्मलालाई न्यायको निम्ति आन्दोलनमा सहभागी बनि वास्तविक अपराधीलाई पक्रेर कडा सजाय नहोउन्जेल दबाब जारी राख्न आह्वान समेत गरेका छन् । निर्मला पन्त हत्या घटनामा सरकार चौतर्फी घेराबन्दीमा परेको छ ।